Acts 7

1Ma Topwaoli Madouna Sitibeni 'ihesilaleya, 'igwae, “Togidega 'idi he'ewa weyahiu, gwae moisa 'awa?”

2Ma Sitibeni 'igwae, “Tasigwao ma tamagwao, 'igu gwae bewa wahesagohe. Yehoba tomiya hane hedada mwalohene tubudai Ebalahamo 'oina 'ilatuwa, tutaina Mesopotemi 'oina 'imiyamiya, ma 'abwa geya 'i'asa'asaliya Helana 'oina, 3ma Yehobaina 'igwae, 'Ebalahamo, 'ino gogo ma 'ino susu bewa 'u'ebesinedi ma 'utauya hali tupwa, tupwaina yahe'itago 'oina.’

4“Ta tupwa Kalidiya 'ihasineya ma 'ilo'asa Helana 'oina. Ma Ebalahamo tamana 'ina 'amasa mulina Yehoba 'ihanugeteya ma 'ebwa 'i'asa, 'ida gogo bewa 'oina, 5ma geya 'eta wete bale'u 'i'ebwae Ebalahamo 'ina 'ebeloina, ma hesi Yehoba 'igwae hemisa tuwa ma 'abehega tupwaina bewa tauna Ebalahamo ma'ina susuwao 'idi bale'u si'ewa, ma tuta nage 'oina Ebalahamo geya natunamo.

6“Ma wete Yehoba 'ihepwaila nugeteya 'abehega Ebalahamo tubunao sihetaumana hali boda 'idi tupwa 'oina, ma toni'asaedi paihowa mwauna nata si'ebwae Ebalahamo tubunao 'oidiya, ta 'idi miya 'igala bolime powa handeledi 'oidiya. 7Ma hesi Yehoba 'igwaeya, 'Cabwa toni'asaowedi loina mwaudi ya'ebwaedi, ma muliyetega tupwa nage 'oinega 'igu bodao silatu ma si'etuluha 'oiguwa tupwa bewa 'oina.’

8“Ma Yehoba 'ina gwaeina 'ana 'ila'ilala 'i'ebwaeya Ebalahamo 'wapina 'ana 'upwa. Coinega Ebalahamo Aisake 'ihenatuneya, ta 'ina sabwelo nima ma hetoina 'oina 'wapina matana 'i'upweya, ma muliyetega Aisake Yakobo 'ihenatuneya, ma muliyetega Yakobo natunao loheloheyadi tuwelo 'ihenatunediya, ma site tuwelowedi tauda tubudao.

9“Ta 'aigeda 'oidiyega sanina Yosepa*, ma tasinao site lebeni sihe'ipi'ipiyeya ma sihegimwaneyeya tomota tupwadi 'oidiya, ma taudi Yosepaina sitauyeya 'asa Itipita 'oina, 10ma Yehoba ba'idana ta 'ilemeya 'ana mwauyao 'oidiyega, ta wete sonoga bwebwe'ana 'i'ebwaeya, ma meItipita 'idi kini Pelo* sonogaina 'i'ita lobeya, 'oinega Pelo Yosepa 'ihemiya haneheya, ma loina 'i'ebwaeya tupwa Itipita mabwaiyana weyahina, ta wete kiniina tauna 'ina hada weyahina.

11“Ma muliyetega gomale madouna 'ilatuwa Itipita mabwaiyana ma 'asa Kenani* 'oidiya, ma miya mwauna moisa 'ihapwesa, ma tubudaowedi geya 'adimo. 12Ta Yakobo tetela 'ihesagoheya 'abehega 'e'ahai Itipita 'oina 'imiyamiya, ma natunao loheloheyadi 'ihesumanediya Itipita 'oina, 'e'ahai weyahina. 13Ma muliyetega wete sihila Itipita 'oina, ma Yosepa tasinao 'oidiya 'igwae latuwa, 'igwae, ‘Taugu tasimiu Yosepa,’ ma Pelo wete 'oina 'ihepwailediya, 'igwae, 'Tasigwao bewa.’

14“Ma Yosepa* tamana Yakobo ma 'ina susuwao 'ibwauwedima, 'adi baibaiwa sebeniti paibi, ma Itipita 'oina sinaoma. 15Ma nobwa Yakoboina 'i'amasa, ma wete tubudaowedi si'amasa, 16ta wawanidi si'ewa hiledima gogo Sekemi 'oina, ma sigalihediya, galihaina mwalo Ebalahamo 'ihemaiseya meSekemi, taudi Hemoli natunao, 'oidiyega, beno galihaina 'ana maisa siliba 'i'ebwaediya.

17“Ma Yosepa 'ina 'amasa mulina Yehoba 'ina gwae hemisa Ebalahamo 'oina 'ihahoho pwaiya, ma meIsileli Itipita 'alona siyada hedada pwaiya, 18eema kini hauhauna 'ihegaina ma 'iloina pa'aledi, kiniina Yosepa geya 'isanapu, 19ma 'i'abowediya, weyahina tubudaowedi 'iloinaedi ma natudiyao 'i'iudi siuledi 'atamana ma si'amasa. 20Ta gwama Mosese 'ili'uwa tuta nage 'alona, tauna 'ana 'ita bwebwe'ana, ma tamana ma sinana 'idi hada si'itayahi dahweya wai'ena 'etoi. 21Ma muliyetega 'idi hadega silagu latuheya, ta Pelo natuna mewahinena 'ilobeya, ta 'itoeya 'ina hada ma 'abehega tauna natuna, ma 'i'itayahiya.

22“Ta Mosese meItipita 'idi sanapu mabwaiyana sihe'iteya, ma 'isanapudiya, ta 'ina gwaeyao ta 'ina paihowao 'oidiya 'ihewaiwai hedada.

23“Ma tutaina 'ana bolime poti 'ilobeya, Moseseina nuwanuwana ma tasinao meIsileli 'ihabo'enedi. 24Coinega 'ina habo'enaina 'alona gwama Itipita 'aigeda 'ilobeya gwama Isileli 'ihunu bwagebwageya, 'oinega Mosese tasinaina 'ilemeya ma gwama Itipitaina 'ilohe'amasiya. 25Ta Mosese 'inuwatuhuya 'abehega tasinaowedi sida sanapu 'abehega tauna nimanega Yehoba 'ida 'abihetedi, ma hesi geya sisanapu.

26“Ma hali sabwelo ta Mosese tasinao 'eluwa 'ilobediya sihehe'upwa, ma nuwanuwana ma 'i'eto'ausidi ma silolagu ma 'igwae, 'Ciyagwao, 'omi susu 'aigeda, ma togidega ma 'imi miya wagihegala?”

27“Ma tohe'upwaowedi 'aigeda 'oidiyega Mosese 'ina gwae 'ihemaiseya, ma 'igwae, 'Taiya 'owa 'utoho ma 'uhetoloina 'oima? 28Togidega? Nuwanuwau ma 'ulohe'amasigau gidemusa boi gwama Itipitaina 'ulohe'amasiya?”

29“Gwae bewa Mosese 'ihesagoheya ma 'i'ateyohowa ta 'idena, ma 'ihetaumana tupwa Midiyani 'oina, ma nobwa 'ihaiya ma natunao loheloheyadi 'eluwa 'ihenatunediya. 30Bolime poti mulina Mosese yoho 'awawa, 'oya Sainai deina, 'iyawayawala, ma anelose 'ilatuwa 'aiwe 'ala'alata ma ninininiminega, 'aiwe manabaina 'alonega. 31Ta Mosese 'i'iteya, 'oinega nuwana 'ihepwanopwanowa, ma 'inaonao deina sabi 'ita, ma Yehoba 'igwaeya, 32'Taugu tubumwao, taudi Ebalahamo ma Aisake ma Yakobo, 'idi Yehoba.’

“Ma Mosese 'ina matautega 'idededela, ma genuwana 'i'ebubuna.

33“Ta Badaina 'igwaeya, 'Caheu 'ana butu* 'uhalolo, weyahina tupwa beno 'oina 'utotoholo beno bale'u hehe'asisina, ta 'igu gwae 'uhesagohe. 34Cigu tomotaiyao Itipita 'alona 'idi miya galana yasanapuya, ta 'idi 'ahwanoi 'atemuyamuya yahesagoha pwaiya, 'abehega yasuluma sabi lemedi. Ta 'owa 'utoholo ma yahewasego Itipita 'oina, paihowa bewa weyahina.’

35“Moisa, Moseseina mwalo silogwahateya, sigwaeya, 'Cowa hene taiya ma 'utoho ma 'uhetoloina 'oima?” Ma hesi tauna Yehoba 'ihesinuweya ma 'abehega 'iloinedi, ma wete 'ilemedi, anelose 'ina lemega, tutaina 'aiwe 'ala'alata 'oina 'ilatuwa 'oina.

36“Coinega Mosese 'ila'ilala waiwaidi ma paihowa 'ebe henainaida 'ipaihowediya, Itipita 'oina ma wete hola bwehabwehalina ma tupwaina yoho 'awawa 'oidiya, tutaina Itipitega 'i'ewa latuhedima ma 'ihenugetediya tupwaina yoho 'awawa bolime poti 'oidiya.

37“Bewa Moseseina meIsileli 'ihegwaediya 'igwae, 'Yehoba 'abwa tasimiyao 'oidiyega 'aigeda palopita 'ihesinuwe weyahimi, gide mwalo 'ihesinuwegauwa.’

38“Ma wete Moseseina yoho 'awawa tubudao mabwaiyadi ba'idanao 'oya Sainai 'oina simiyamiya, ma anelose Mosese loina bwebwe'ana yawasida weyahina 'i'ebwaeya.

39“Ma tubudaowedi Mosese sihe'idi'idiyeya ta 'ina loina silogwahateya, ma nuwanuwadi ma sihila Itipita 'oina, 40ma tasina Eloni* sihegwaeya, sigwae, 'Cida 'ebe 'etuluha 'upaihowadi ma sihanugetegita, weyahina Mosese tauna mwalo Itipitega 'ihanugetegitama, geya tasanapu ta'eha nana 'itauya?” 41Coinega 'idi 'ebe 'etuluha tala bulumakau si'abiya, ma 'oina sipwaopwaoli, ma weyahina siyaliyaya madouna.

42“Coinega Yehoba 'ilogwahatediya ta 'abehega siboi 'idi nuwatuhu sida paihowa, beno 'wadima 'oidiya sida 'etuluha, gidemusa palopitao 'idi buki 'alona Yehoba 'ina gwae 'imiyamiya, 'igwaeya,

'Comi meIsileli bolime poti tupwaina yoho 'awawa
wamiyamiya, hebahebaiyao wahunudi ma geya 'oiguwa wada pwaolidiya. 43Ma hesi hali 'ebe 'etulahaina sanina Moloke 'oina wapwaopwaoliyedi ma Molokeina 'ina hada wa'aha'ahali ba'idamiu, ma wete Lipani 'ina 'wadimaina 'oina watulutuluha, ma wete ginaulaedi wa'abidiya matadiya wa'ahwa'ahwanoi, 'oinega yada pa'igomi ma watauya hali 'asa Babiloni papalina.’”
44Sitibeni wete 'igwaeya, “Tubudaowedi Yehoba 'ina hada si'abiya 'ana 'ita gidemusa Yehoba Mosese 'ihegwaeya ma 'ida 'abi'ese. Coinega si'abiya, ma mwalo tutaina yoho 'awawa sitautauya, Yehoba 'ina hadaina wete si'aha'ahala dadane.

45“Loheloheyaedi si'amasa ma mehau hadaina si'eweyama, taudi tubudao Yosuwa ba'idanao. Mwalo hali bodao tupwa bewa 'ebwa simiyamiya, ma hesi Yehoba Yosuwa* ba'idanao 'ilemedi ma sihewaiwaiya bodaedi sipa'idiya, sidena, ta Yosuwa ba'idanao bale'u bewa si'eweya, ta 'ebwa hadaina 'imiyamiya ma 'ana siga Debida 'ihetoloina. 46Ma Debidaina weyahina Yehoba 'iyaliyaya, tauna tubudai Yakobo 'ina Yehoba, ma Debida Yehoba 'oina 'i'ahwa'ahwanoi ma 'eguma sowasowahina 'abehega Yehoba 'ina hada hauhauna 'ida 'abi. 47Ma hesi Debida natuna Solomoni hadaina 'i'abiya. 48Ma hesi wanuwatuhu 'abehega Yehoba tauna tomiya tabwana hedada geya'abwa hada tomota nimadiyega si'abi'abi 'oina 'imiyamiya, weyahina palopita 'aigeda Yehoba 'ina gwae mwalo 'ihepwaila pwaiyeya, 'igwae,

49'Galewa 'igu wagahata wasawasa, ma bale'u 'ahegu 'adi
'ebelagu. Coinega to hada sowasowahimi ma weyahigu
wada 'abi, ma hadaina 'oina ya'aiyawasi? 50Weyahina ginaulaedi
bewa mabwaiyadi taugu yapaihowediya.’”
51Ma Sitibeni 'ihegwaediya wete 'igwae, “Moisa, 'omi tonuwa potapota, 'oinega Yehoba 'ina 'ila'ilala 'upwa 'wapimimo 'oina, ma geya 'atemiyega ma wete geya tenamiya, 'oinega tuta baibaiwana Yaluyaluwa Tabuna 'ina loina walologwahate, gidemusa tubumiyao silogwahateya. 52Ma wete, tubumiyao palopita mabwaiyadi simumuga galagalaediya ma silohe'amasidiya, palopitaowedi taudi Todumwalu 'ina latuma sihepwaila nugeteya, 'oinega 'omi wete Todumwaluina watebaeya ma walohe'amasiya. 53Ta 'omi mwalo aneloseyao Yehoba 'ina loina si'ebwaegomiya, ma hesi geya wada muliyeya.”

Sitibeni silohe'amasiya

54Sitibeni 'ina gwae bewa toloinao sihesagoheya ta sigamwasowala madouna, ma sihesala'i'ita 'idi gamwasowala weyahina. 55Ma hesi Yaluyaluwa Tabuna Sitibeni 'ilohemaheya, ma galewa 'i'e'ebubuya ta 'i'iteya Yehoba ma'ina wasawasa maemaedanina, ma Yesu 'ina 'ebeulega 'itotoholo, 56ma 'igwaeya, “Wa'ita, galewa 'i'eso'eya, ta ya'iteya Loheyaina Yehoba 'ina 'ebeulega 'itotoholo.”

57Ma Sitibeni 'ana 'alehao siwuiwui 'enadi madounega, ma tenadi si'ausidiya ta 'abehega Sitibeni 'ina gwae sahena sihehesagohe, ma mabwaiyadi sipiliya, ta si'abiyahiya, 58ma 'asega siula latuheya, ma da'uleyega si'ahuhe 'amasiya. Ma Sitibeni 'ana tohe'ewa 'abo'abowao 'adi 'ale'owao silolodiya ta 'abehega da'uleyega Sitibeni sida hunu. Ma 'adi 'ale'owedi hewali sanina Saulo 'i'itayahidiya. 59Eema Sitibeni siloloda'uleyeya, ma hesi 'ibwau haneya 'igwae, “Bada Yesu, yaluyaluwagu 'u'eweyawa.” 60Ta 'i'ahetulasa, 'ibwau 'enana madounega, 'igwaeya, “Bada yo, 'idi mumuga galana bewa geya'abwa 'uhehemaise 'oidiya.”

Cina gwaeina 'igumwala, ta yawasina 'igumwala.